سياسة الخصوصية

خصوصيتك مهمة إلنا. هاي الصفحة بتشرح بوضوح شو المعلومات اللي بنجمعها لما تستخدم OnSide، ليش بنحتاجها، ومين بيقدر يشوفها، وكيف بتقدر تتحكم فيها.

شو المعلومات اللي بنجمعها

معلومات الحساب: اسمك، إيميلك، وصورتك الشخصية. إذا دخلت بحساب Google، بنستلم من Google الاسم والإيميل والصورة بس، وما بنوصل لأي إشي تاني بحسابك (لا إيميلاتك ولا ملفاتك ولا جهات الاتصال).
معلومات الملف الشخصي اللي بتعبّيها بنفسك، مثل مستواك ومركزك ومنطقتك ونبذة عنك، ورقم الواتساب إذا حطّيته.
نشاطك عالموقع: المباريات اللي بتحجزها أو بتنضم إلها، التقييمات، الأصدقاء، الفرق، والمنشورات والتعليقات.
معلومات الدفع: إذا رفعت إيصال تحويل (مثل CliQ)، بنخزّن صورة الإيصال عشان الإدارة تأكد الدفع. ما بنخزّن أرقام بطاقات ولا معلومات بنكية.

ملفك العام (اسمك، صورتك، منطقتك، مركزك، مستواك، نبذتك، إحصائياتك، صحابك وسكواداتك ومنشوراتك) بيقدر يشوفه أي حدا بيفوت عالموقع، وكمان اسمك بتشكيلة المباريات اللي حاجزها. صفحات اللاعبين مخفية عن محركات البحث.
إيميلك ورقم الواتساب ما بيظهروا للاعبين التانيين، بتشوفهم الإدارة بس عشان تتواصل معك بخصوص الحجز.
تلقائياً بينزل بالمنشورات إذا أخدت أفضل لاعب أو وسام أو انضميت لسكواد.
إدارة OnSide وأصحاب الملاعب بيشوفوا المعلومات اللازمة لتنظيم المباراة وتأكيد الدفع.
بنستخدم خدمات موثوقة لتشغيل الموقع: Supabase لتخزين البيانات وتسجيل الدخول (سيرفرات بالاتحاد الأوروبي)، وVercel لاستضافة الموقع، وGoogle لتسجيل الدخول إذا اخترته.

كل الاتصال بالموقع مشفّر (HTTPS).
ما في كلمات سر عندنا أصلاً: الدخول برابط أو كود عالإيميل أو بحساب Google، فما في كلمة سر ممكن تتسرّب.
قاعدة البيانات محمية بقواعد صلاحيات صارمة: كل لاعب بيعدّل بياناته بس، والمعلومات الخاصة (الإيميل والواتساب والإيصالات) ما بيوصلها إلا صاحبها والإدارة، والإجراءات الحساسة بتتأكد إنو اللي بيطلبها أدمن.
إيصالات الدفع محفوظة بمكان خاص ما بيشوفه إلا صاحبها والإدارة.

بتقدر تعدّل معلوماتك من صفحة الملف الشخصي بأي وقت.
بتقدر تطلب نسخة من بياناتك أو تطلب حذف حسابك وكل بياناتك، وبنرد عليك خلال 30 يوم.
إذا دخلت بـ Google، بتقدر تلغي صلاحية OnSide بأي وقت من إعدادات حسابك بـ Google.

بنستخدم كوكيز ضرورية بس: عشان تضل مسجّل دخول وعشان نتذكر لغتك وشكل الموقع (فاتح/غامق). ما بنستخدم كوكيز إعلانية أو تتبّع.

لأي سؤال أو طلب بخصوص بياناتك، راسلنا على onsidejo@gmail.com

آخر تحديث: 16 تشرين الأول 2026 · شروط الاستخدام